 |
|
|
|
Brwydr Moderniaeth a Beirdd Modern Alan Llwyd  Mae’r gyfrol hon yn cynnwys un ar ddeg o ysgrifau, gan gynnwys rhai ysgrifau estynedig, ar rai o feirdd a llenorion yr ugeinfed ganrif. Trafodir gwaith Thomas Hardy; Edward Thomas a Robert Frost; cerddi eisteddfodol Cynan; pryddestau eisteddfodol Caradog Prichard; ‘Atgof’, E. Prosser Rhys, a ‘Bro fy Mebyd’, Wil Ifan; dwy awdl gan Gwenallt, ‘Y Sant’ a ‘Breuddwyd y Bardd’; y ddrama Cwm Glo gan J. Kitchener Davies; a gwaith Waldo Williams, Bobi Jones, Gwyn Thomas a Ted Hughes. Rhoir unoliaeth i’r gyfrol gan sawl thema. Mae’n ymwneud â sylfeini, i ddechrau: sylfeini Moderniaeth yn gyffredinol, a sylfeini Moderniaeth yng Nghymru yn enwedig. Canolbwyntir yn bennaf ar weithiau a oedd yn chwyldroadol yn eu dydd, o waith Hardy, un o dadau Moderniaeth yn Lloegr, hyd at y ddrama Cwm Glo: gweithiau a ehangodd ffiniau thematig, strwythurol ac ieithweddol y Gymraeg. Mae’r pedair ysgrif olaf yn dathlu cyflawniad Moderniaeth yn hytrach na’i dechreuad. Yn ogystal â thrafod gwreiddiau Moderniaeth, trafodir gwreiddiau gweithiau diweddarach yma’n ogystal. Mae’r astudiaeth arloesol o farddoniaeth Caradog Prichard, er enghraifft, yn dangos fel yr oedd y farddoniaeth honno, yn y pen draw, wedi arwain at y nofel Un Nos Ola Leuad, un o nofelau pwysicaf yr iaith Gymraeg. Mae’r gyfrol yn gynnyrch meddwl gwreiddiol ac annibynnol beirniad llenyddol y dywedwyd hyn amdano gan Dewi Stephen Jones mewn cyfrol ddiweddar: Gallu mawr Alan Llwyd fel beirniad yw datgloi a dehongli’r gerdd unigol a’i gosod o fewn cyd-destun – ei lle yng ngwaith yr artist a’i harwyddocâd yng nghyd-destun ei oes. ISBN 1 900437 61 9 Pris: £15.00 |
|
|